İslam dünyası müqəddəs Ramazan ayı içindədir. Müsəlmanlar üçün xeyir-bərəkət, günahlardan, pis əməllərdən uzaq olmaq ayı olan bu dönəmdə belə İran adlanan rejim Azərbaycan türklərinə qarşı zülmünü dayandırmır. Ramazan ayı içində də soydaşlarımızın həbsi, təqibi, Tanrının ən sevimli yaradılışı olan İnsanın doğal haqlarının ayaqlanması davam edir.

Burda əsarət altında inləyən soydaşlarımızın səsini dünyaya yalnız Azərbaycan mediası və dünyaya səpələnən mühacir azərbaycanlılarla çatdırılır. Çox təəssüf ki, son vaxtlar mediamız Güney Azərbaycan məsələsini arxa plana atıb. Hətta bəzi media orqanlarında bu mövzuya qadağa qoyulub. İran rejiminin Azərbaycan Respublikasının dövlət müstəqilliyi ilə heç cür barışmamasından yaranan təxribatçı əməlləri və son vaxtlar dünyada süni şəkildə qızışdırılan İslam təfriqəçiliyi təhlükəsi Azərbaycan dövlətini rəsmi mövqeyində və xarici siyasətində bir çox məsələlərə ehtiyatlı yanaşmağa vadar edir. Bu mövqe müəyyən mənada başa düşüləndir. Amma rəsmi dövlət adamlarımızın fikirlərini özlərinə qadağa kimi qəbul edərək Güney Azərbaycan mövzusuna medianın embarqo qoyması heç cür qəbul edilə bilməz. Vətənimizin güneyində minlərlə soydaşımızın həbsxanalarda çürüdüldüyü, milyonlarla həmvətənimizin milli və insani haqqının tapdandığı bir vaxtda Azərbaycan mətbuatı, xüsusilə elektron KİV susa bilməz.

Biz DAK olaraq hörmətli qələm əhlini İran adlı rejimin özbaşınalıqlarını, burda yaşayan soydaşlarımızın problemlərini gündəmdə saxlamağa və milyonların səsini dünyaya çatdırmağa çağırırıq.