"Rusiyanın Azərbaycanla bağlı planları yavaş-yavaş ortaya çıxır".

Bunu Axar.az-a politoloq Fərhad Mehdiyev bir gündə bu qədər itki verən Azərbaycanın düşmən tərəfə bundan sonra necə reaksiya verəcəyi ilə bağlı danışarkən deyib.

Politoloqun sözlərinə görə, dünəndən birdən-birə cəbhədə bu qədər aktivliyin artması birbaşa Rusiyanın Azərbaycana basqısıdır:

"Bu, Rusiyanın Azərbaycana onların tərəfinə keçməsi üçün göstərdiyi basqıdır. Eyni zamanda bu, Rusiyanın öncədən düşünülmüş və planlaşdırılmış təzyiqləridir. Düşünmürəm ki, Rusiya tərəfi bunu müharibəyə çağırış üçün etsin. Çünki onun özü də məsələnin müharibəyə qədər çatmasını istəmir. Hazırda Avropa tərəfindən qınaq obyektinə çevrilən və Ukraynada istədiyini edə bilməyən Rusiya indi də Qarabağ məsələsində, necə deyərlər, Azərbaycanı sındırmaq istəyir".

Politoloqun sözlərinə görə, bu mərhələdə Azərbaycan ciddi diplomatiyaya başlamalıdır ki, Rusiyanın mövcud planları ortaya çıxarılsın:

"Belə düşünürəm ki, Azərbaycan baş verən bu olayda təmkinli olmalı və səfərbərlik hazırlıqlarının getdiyini göstərməlidir. Bu yolda Türkiyə ilə razılığa gəlib Naxçıvanda türk alayları yerləşdirmək və hərbi dəstəyi təmin etmək lazımdır. Bundan sonra isə Misir-İsrail müharibəsindəki kimi İsrailin yolu ilə getmək lazımdır".

Fərhad Mehdiyev onu da qeyd etdi ki, Amerika ilə razılığa gəlib peyk dəstəyini təmin etmədən müharibəyə başlamaq olmaz: "Bizdə zondal, yəni kameraları olan peyk sistemi yoxdur. Zondal peyk düşmənin yer dəyişməsi, mövqeyi, silahlarının sayı və növü, dəqiq atışların aparılması üçün vacibdir. Yalnız bu yolla döyüş zonasında daim çəkiliş aparmaq və Rusiyanın yalançı iftiralarının qarşısını almaq olar. Kəşfiyyat məlumatları zəfərin vacib şərtidir. Ancaq mən yenə də iri çaplı müharibənin olacağını hesab etmirəm".