14:23

Tovuz rayon sakinləri rayon ərazisindəki Əsrik adlanan dağ ərazisində bir nəfər mülki geyimli ermənini saxlayıblar.

Rayon sakinlərinin Axar.az-a verdiyi məlumata görə, Azərbaycan-Ermənistan sərhədini pozan həmin erməninin diversant olmasından şübhələnirlər.

Hadisə yerinə dərhal Milli Ordunun əsgərləri gəlib və diversant olduğu ehtimal olunan erməni əsiri aparıblar.

Əsirin üzərində sənədi olmadığından onun ad-soyadını dəqiqləşdirmək mümkün olmayıb.

Müdafiə Nazirliynin mətbuat xidməti ənənəvi olaraq son bir həftəlik fəaliyyətinə sadiq qalıb, bu haqda heç bir açıqlama verə bilməyəcəyini dedi. Nazirliyinin mətbuat xidmətinin əməkdaşı İsa İsmayılov bununla bağlı məlumatlı olmadığını bildirdi və Azərbaycan Respublikası Əsir və İtkin Düşmüş, Girov Götürülmüş Vətəndaşlarla İş üzrə Komissiyaya müraciət etməyimizi məsləhət gördü.

Xatırladaq ki, sözügedən komissiya yalnız əsir düşən Azərbaycan vətəndaşları ilə bağlı iş aparır.

Faktı dəqiqləşdirməyə çalışırıq.

14:45

Publika.az-ın məlumatına görə, əsir düşən Ermənistan vətəndaşı Petrosyan Artuş Dalen oğludur. Əsir Tovuz rayonunun Ağbulaq kəndində kənd sakini Məmmədov Pərviz Paşa oğlu tərəfindən saxlanılıb.

15:02

Bu gün 13.30 radələrində Tovuz rayonunun düşmənlə təmas xəttində yerləşən Ağbulaq kəndində erməni diversant qrupu Azərbaycan tərəfinə keçməyə cəhd edib.

Publika.az-ın əldə etdiyi məlumata görə, Azərbaycan kəşfiyyatçıları qrupun neytral ərazidən bizim tərəfə keçməsinə qəsdən şərait yaradıblar. Məqsəd qrupu tam tutmaq olub.

Qrupun bələdçisi Petrosyan Artuş Dalen oğlu Tovuzun Ağbulaq kəndinə girib.

Bu zaman kənd sakinləri onu görərək saxlayıblar. Erməninin izi ilə gələn hərbçilərimiz onu sakinlərdən alıblar.

***

Axar.az xəbər verir ki, Ermənistanın "www.yerkirmedia.am" saytı da Tovuzda əsir düşən erməni təxribatçısı barədə xəbər yayıb.