Azərbaycan Prezidenti İlham Əliyevin qızı, Heydər Əliyev Fondunun vitse-prezidenti Leyla Əliyeva Azərbaycan xalqına müraciət edib.

Axar.az xəbər verir ki, L.Əliyeva müraciəti özünün Feysbuk səhifəsində yazıb:

"Bu gün mən Azərbaycan Respublikasının müstəqilliyinin keşiyində duran Silahlı Qüvvələrə, döyüşçülərə, hərbçilərə, sərhədlərimizi qoruyanlara, eləcə də ictimai-siyasi xadimlərə, intelligentlərə, dövlət orqanlarına, dövlət orqanlarında çalışan şəxslərə, Vətənini sevən Azərbaycan Respublikasının hər bir vətəndaşına müraciət edirəm.

Bizim gələcəyimiz öz əlimizdədir. İndi sizinlə Vətənimzin, torpağımızın, ölkəmizin sahibiyik, biz öz taleyimizi özümüz həll etməyi əldə etmişik. Qarşımızda duran əsas məsələ bu imkanı əldən verməmək, müstəqilliyimizi qorumaq ölkəmizi inkişaf etmiş ölkələr səviyyəsinə çatdırmaq və dünya ictimaiyyətində yüksək yerləri tutmaqdır. Rusiyada Azərbaycan Gənclər Təşkilatının rəhbəri kimi mən bütün bunları özüm üçün əsas hesab edirəm. Ümid edirəm ki, hər bir azərbaycanlı-vətənpərvər, öz Vətənini sevən şəxs də bunu özü üçün əsas hesab edəcək".