Mən bu istiqamətdə olan narazılığı tam şəkildə dəstəkləyirəm. Hesab edirəm ki, üzərində erməni dilində yazı fərqləndirilən hər hansı bir məhsulun Azərbaycana gətirilməsi düzgün deyil.

Bu sözləri Axar.az-a millət vəkili Aydın Mirzəzadə üzərində erməni dilində olan yazının fərqlənməsi ilə diqqət çəkən Rusiya istehsalı “Choco Pie Lotte” şirniyyatınının Azərbaycana gətirilməsi və satışı ilə bağlı danışarkən deyib. O bildirib ki, Azərbaycan şirkətləri düşmən ölkənin bu və ya digər şəkildə təbliğinə xidmət edən bu tip məhsulların ölkəyə gətirilməsi zamanı ciddi düşünməlidirlər:

“Azərbaycana xaricdən mal gətirən şirkətlər və sahibkarlar bu məsələyə çox ciddi diqqət etməlidirlər. Ümumiyyətlə, sözügedən məhsulun üzərində erməni dilində fərqləndirilmə olmayan digər növləri də var, niyə o məhsullar varkən ermənicə yazısı fərqləndirilmiş məhsullar gətirilməlidir? Məqsəd nədir? Bu hal mütləq şəkildə aydınlaşmalıdır”.

Millət vəkili Azər Badamov da Azərbaycanda üzərində erməni dilində fərqləndirilmiş yazı olan məhsulun satılmasını düzgün hesab etmədiyini bildirib:

“Bir məhsul bir neçə ölkəyə satıldığı üçün məhsulun arxasında kiçik hissədə ixrac edilən ölkələrin dilində yazı ola bilər. Ancaq ixrac edilən ölkələrdən birinin dili fərqləndirilirsə, burda iki hədəf var: ya təbliğatdır, ya da sırf sözügedən ölkəyə göndərilən məhsuldur. Səhv qablaşdırılmadısa və Ermənistana göndərilən məhsul Azərbaycana gətirilibsə, buna görə vasitəçi şirkət üzr istəməlidir, təbliğatdırsa, məhsuldan imtina edilməlidir. Bütün hallarda sahibkarlar belə məsələlərdə səhlənkarlığa yol verməməlidir. Xalqın həssaslığı nəzərə alınmalıdır, məhsulu ermənilərin istehsal edib-etmədiyi mütləq araşdırılmalı, sonra ölkəyə gətirilməlidir. Azərbaycanda marketlərdə ermənicənin fərqləndiyi məhsul satıla bilməz”.

Qeyd edək ki, bir neçə gün əvvəl tanınmış jurnalist Xalid Kazımlının paylaşdığı və üzərində ermənicə yazı ilə diqqət çəkən “Choco Pie” şirniyyatı geniş müzakirəyə səbəb olub. “Choco Pie Orion”dan (orijinal) fərqli olaraq, “Choco Pie Lotte” şirniyyatında erməni dilində yazı fərqləndirilir və Rusiyada olan bu zavodun ermənilər tərəfindən işlədildiyi ehtimalı var.

Xatırladaq ki, Ermənistanda istehsal edilmədiyi üçün bu məhsulun ölkəyə gətirilməsi qanunla qadağan olunmasa da, erməni sahibkarların biznesinin çiçəklənməsinə rəvac verməmək və azərbaycanlıların pulunun ermənilər vasitəsilə öz əleyhimizə çevrilməməsi niyyətilə bu tip məhsullardan imtina həm də milli məsələdir.