Sabunçu rayon birinci Zabrat qəsəbəsi Seyid Əzim Şirvani küçəsində Azərsu ASC tərəfindən su xətti çəkildikdən sonra yollar təmir edilməyib.

Bu barədə sözügedən qəsəbə sakini Ramil Qasabov Axar.az-a ünvanladığı şikayət məktubunda qeyd edib. O bildirib ki, yağışlı hava şəraiti ilə əlaqədar həmin yollarda sakinlərin gediş-gəlişi çətinləşib:

“Bir neçə il əvvəl də Seyid Əzim Şirvani küçəsində kanalizasiya və su xətləri çəkilib. İşlər bitdikdən sonra aidiyyəti qurumlar yolun yarısını təmir etsələr də, digər yarısı üçün vəsaitlərinin çatmadığını bildirdilər. Buna görə, biz - məhəllə sakinləri məcbur olub, öz cibimizdən yolun qalan hissəsini təmir etdirdik. Təxminən 15 gün əvvəl Azərsu ASC-nin işçiləri yenidən su xətlərinin çəkilməsi üçün yolu qazdılar. Hazırda iş bitsə də, yollar təmir edilməyib. Son günlər hava yağmurlu keçdiyi üçün yollarımız istifadəyə yararsız vəziyyətə düşüb. Aidiyyəti qurumlara müraciət etsək də, cavabsız qalıb”.

Məsələ ilə bağlı saytımıza açıqlama verən Azərsu ASC-nin mətbuat xidmətinin rəhbəri Anar Cəbrayıllı bildirib ki, sözügedən qəsəbənin digər küçələrində də təmir işləri davam etdiyi üçün yollar asfaltlanmayıb:

“Sözügedən ərazidə bizim podratçılar su xətlərini çəkiblər. Azərbaycan Avtomobil Yolları Dövlət Agentliyi ilə birlikdə koordinasiyalı iş görürük. Hazırda isə Zabrat qəsəbəsinin bir neçə küçəsində işlər davam etdirilir. Bütün küçələrdə xətlər çəkildikdən sonra həmin ərazilər asfaltlanacaq”.