Sosial şəbəkələrdə Ana Vətən Partiyasının Bərdə rayon təşkilatının sədri Orxan Əhmədzadənin videosu yayılıb. Həmin videoda təşkilat sədri yaşlı insanlara çörək paylayır və orada təmsil etdiyi partiyadan, onun rəhbəri, deputat Fəzail Ağamalı haqqında danışır. Eyni zamanda, O.Əhmədzadə öz təşəbbüsü ilə bu yardımı etdiyini söyləyir.

Axar.az xəbər verir ki, iki-üç çörəyin yaşlılara bu şəkildə təbliğatla verilməsi və bunun çəkilərək, yayılması ciddi tənqid edilib.

F.Ağamalı Musavat.com-a açıqlamasında adı keçən təşkilat sədri ilə danışdığını bildirdi:

“Bu, birbaşa Bərdə rayon təşkilatının təşəbbüsü olub. Mənə partiyanın mətbuat xidmətindən söylədilər ki, Bərdə rayon təşkilatı rayonda “Evdə qal” təşviqatını apara biləcək müəyyən aksiyalar keçirmək istəyir. Dedim ki, çox düşünülmüş şəkildə aksiya təşkil olunsun ki, sonradan problem yaranmasın. Dedilər ki, yox problem yaranmayacaq, sadəcə, evlərə gedəcəyik, imkan daxilində ərzaq verəcəyik. Yaşları 65 yaşdan yuxarı, ehtiyacı olan insanlara ərzaq verəcəklərini dedilər. Dedim ki, çox sakit şəkildə bunu edin, çəkiliş filan da olmasın. İndi buna deyilib, sonradan çəkiliş aparıb, heç bir ehtiyac olmadan adımı da çəkib. Özü elə düşünüb ki, adımı çəkmək yaxşı olar. Məni orada təbliğ etmək istəyib. Halbuki buna heç bir ehtiyac yox idi. Sadəcə olaraq, onun niyyəti birbaşa tam məsuliyyətlə deyirəm ki, “Evdə qal” aksiyasına xidmət etmək olub - öz səviyyəsində Bərdə rayonu içərisində. Orada video da çəkdirib. Bir ailəyə yox, məndə olan məlumata görə, yüz ailəyə və ailənin hər bir üzvünə öz vəsaiti hesabına bir çörək verib. 1-2 yerdə video çəkib. Onu da götürüb kəsiblər, adım olan hissələri saxlayıblar”.

Millət vəkili bildirib ki, Orxan Əhmədzadə ilə əlaqə saxlayıb:

“Ona dedim ki, bundan sonra sən bu cür addımlar atsan, səni partiya səviyyəsində tənbeh edəcəm. Sual verdim ki, sən aksiyanı dediyim kimi eləmisən, təsdiqlədi. Bildirdi ki, niyyətim ancaq “Evdə qal” aksiyasına xidmət etmək olub. İnsanların çölə çıxmaması, maariflənməsi baxımından bunu etdiyini söylədi. O insanların daha çox çörək üçün bayıra çıxdıqlarını qeyd etdi. Onu da bildirdi ki, çörək paylasam, o insanlar bayıra çox çıxmazlar, bu da mənim xidmətim olar. Dedim, yaxşı bunu et, ancaq video çəkmə, heç bir danışıq aparma. İndi nə etmək istədiyi barədə də sual verdim. Bildirdi ki, ayın 20-ə kimi öz vəsaitim hesabına bunu davam etdirmək istəyir. Xahiş etdi ki, onun bu xeyirxah işinə razılıq verim. Bundan sonra heç bir danışıq aparmayacağını, heç bir video çəkməyəcəyini, sadəcə, aksiyanı davam etdirəcəyini bildirdi. Təbii ki, onun vətəndaşlıq təşəbbüsünə mənfi yanaşmadım. Ancaq ona bir daha qəti şəkildə tapşırdım ki, heç bir video-filan olmadan işini davam etdirirsən, deyəcəyin söz yalnız o olmalıdır ki, “Evdə qal”ın, bayıra çıxmayın, virusa yoluxmayın, yoluxsanız, çoxsaylı insanı da yoluxdura bilərsiniz, ailəniz, övladlarınız virusa yoluxa bilər. Bunlardan başqa, heç bir söz işlətməməsini qəti şəkildə tapşırdım. O da bununla razılaşdı. Bundan sonra çox güman ki, o, başlamış olduğu aksiyanı davam etdirəcək. Eşitdiyim qədəri ilə onun bu aksiyası Bərdədə çox hörmətlə qarşılanır. İndi onun səhifəsini izləməmişəm”.

Deputat bu işi təşkil edənlərə də mesaj göndərib:

“Bu cür aksiyanı bu formada aşağılamaqda, onu ən müxtəlif formada gülüş hədəfinə çevirməyə çalışmaqda məqsəd Orxan Əhmədzadənin atmış olduğu bu xeyirxah təşəbbüsə kölgə salmaqdır. Təşəbbüs göstərənlərin dərhal üzərinə gedirlər. Bunlar qaragüruh qüvvələrdir. Bu təşəbbüslərə qoşulmaq istəyənləri uzaqlaşdırmaq istəyirlər. Hər halda bu cür videoları kəsərək, bəlli bir hissəni qoyaraq, onu başqa sözlə sosial şəbəkədə yaymaq düşünürəm ki, antimilli mahiyyət daşıyan hərəkətdir. Bütün bunları tamamilə qınayıram”.