Ermənistan Azərbaycan ərazisinin 20 faizini qanunsuz olaraq işğal etdiyi halda 30 il ərzində dünya birliyi harada idi?

Axar.az xəbər verir ki, bu sözləri politoloq Roman Qureviç Yutubda yerləşdirdiyi video-çıxışı zamanı deyib. Onun sözlərinə görə, Azərbaycan tam hərbi və texnoloji üstünlüyə sahib olmasına baxmayaraq, 30 il ərzində açıq hərbi əməliyyatlar etmək istəməyib:

“Çünki Bakını müharibə maraqlandırmır və rəsmi Bakı torpaqlarını diplomatik, qansız, dinc yollarla azad etmək üçün hər şeyi etdi”.

Politoloqun sözlərinə görə, Qarabağdakı vəziyyət son illərdə barıt çəlləyini xatırladırdı. Burada müxtəlif ölkələrin maraqları var:

“Azərbaycan, Ermənistan, Rusiya, İran, Türkiyə və sairə. Burada olduqca incə və ehtiyatlı davranmaq lazım idi. Paşinyan rəhbərliyi məqsədyönlü şəkildə Dağlıq Qarabağ münaqişəsinin həlli üçün siyasi proses cəhdlərinin qarşısını almağa başladı. İndi beynəlxalq hüququn istənilən normasına görə suveren Azərbaycana məxsus olan işğal olunmuş ərazilərin azad edilməsi üçün döyüşlər davam edir”.

Qureviç rəsmi Bakının münaqişəni sülh və diplomatiya yolu ilə həll etmək istəməsinə rəğmən müharibəyə başlamasının səbəbkarı kimi Ermənistanı göstərib:

“Əgər Ermənistan rəhbərliyi nümayişkəranə şəkildə müttəfiqlərini təşviqata vadar edirsə, Azərbaycanın bütün tolerantlığına, səbrinə, müharibə aparmaq istəməməsinə baxmayaraq, Azərbaycan tərəfinin öz torpaqlarını işğaldan azad etmək uğrunda başlatdığı ədalətli müharibəni düzgün seçim kimi qiymətləndirirəm”, – deyə politoloq bildirib.