Sosial şəbəkələrdə keçmiş sovet ordusunun 366-cı motatıcı alayının Ukraynada məhv edildiyi bildirilir. Ukraynada rus hərbi hissələri məhv edilə bilər, bunun Xocalı qətliamında əli olan 366-cı motoatıcı alayla bağlılığı yoxdur.

Bu sözləri Axar.az-a açıqlamasında hərbi ekspert Ədalət Verdiyev deyib.

O bildirib ki, alayın ləğvindən 29 il keçib:

“Hadisələri izləməyən insanlar ictimaiyyəti yanlış istiqamətə yönləndirirlər. 1992-ci il Xocalı hadisəsindən sonra ermənilərin işğalçılıq fəaliyyəti 366-cı alayın silahlarının hesabına daha da genişləndi. Həmin alayın texnikasının bir hissəsini Seyran Ohanyan götürdü, ruslara vermədi. Digər hissəsini isə alay Qarabağdan çıxarkən Ohanyanın ətrafındakılar yolu kəsib aldılar”.

Ə.Verdiyevin sözlərinə görə, ermənilərin texnikaları verməmələri səbəbindən ruslar Gəncədəki 103 və 104-cü paraşüt desant qüvvələrini qoşunların təhlükəsizliyini təmin etmək üçün göndərmişdi:

“Sonradan köməyə gedən bir helikopteri də ermənilərə verdilər, o texnikaları da satdılar. Rus əsgərlərini çıxarıb Gəncəyə gətirdilər, oradan isə Gürcüstanda rusların Vaziani hərbi bazasına göndərdilər. Orada 366-cı alayı ləğv edib, heyəti payladılar. Onsuz da alayın texnikası qalmamışdı”.

Ekspert deyib ki, hərbi hissə ləğv olunursa, artıq onun qalıqlarından söhbət gedə bilməz:

“Məntiqlə düşünsək, 30 il əvvəl orada hərbi hissə komandiri 40-50 yaşında biri olub. 30 il sonra onun orduda nə işi var? Əsas alayın nömrəsidir. Hərbi hissənin döyüş yolunun tarixçəsini onun nömrəsi ilə yazırlar. Amma Xocalı hadisələrindən 1 ay sonra 366-cı alay ləğv olundu”.