Ankaradakı partlayış sərhəd və cənub-şərqi Anadoludakı rayonlarımızda başladılan işğalın bir parçasıdır.

Axar.az xəbər verir ki, bu barədə "Yeni Şəfəq" qəzetinin yazarı İbrahim Qaragül köşəsində yazıb. O, sözügedən terrorun media və sərmayə üzərindən hesablanmış "daxili işğalın" davamı adlandırıb:

"Məqsəd sadəcə AKP və Ərdoğanı vurmaq deyil, Türkiyəni vurmaq və Suriyalaşma planını işə salmaqdır. Bəlkə kamikadzenin kimliyini, hətta hansı terror təşkilatına məxsus olduğunu təsbit etmək mümkün olacaq, ancaq daxildəki güclər heç bir zaman deşifrə olmayacaq. Bütün qaranlıq işlərin üstü İŞİD-in üzərindən bağlanacaq. Çünki bu, geniş layihələrin bir parçasıdır. Davudoğlnun səyləri, Ərdoğanın dirənişi Türkiyənin gələcəyini qurtara bilər. Ankaradakı terrorun ardından Səudiyyə kralının sui-qəsd xəbəri gəldi, indi də Riyadda dövlət çevrilişi iddiaları dolaşır. Eyni gündə Türkiyəyə dəstək xarakterli açıqlamalarla çıxış edən Bərzanini bu əlaqələrindən dolayı İran və PKK cəzalandırmağa çalışır. Türkiyə nə zaman Suriyada bir addım atsa, YPG-yə zərbə endirsə, daxildə İŞİD görüntüsü altında terror hücumları ortaya çıxır. Ankara olayının da altından İŞİD çıxacaq. Türkiyəyə "Suriyadan əlinizi çəkin" mesajı verənlər sizcə kimlərdir? Son zamanlar Suriya üzərində yaranan ittifaqlara diqqət etmək kifayətdir".