Paraqvay televiziyasında "Paraqvay iqtisadi forumu"nun təsisçisi Piter Teyz çıxış edib. O, Paraqvayın logistika potensialından və dünyanın digər dövlətləri ilə iqtisadi münasibətlərin inkişafından danışıb.

Axar.az xəbər verir ki, P.Teyz nəqliyyat industriyası və logistika xidmətlərinin inkişafında Azərbaycanın təcrübəsini nümunə göstərib. O, Paraqvayın ABŞ, habelə Azərbaycan da daxil olmaqla Xəzər regionu ölkələri ilə əməkdaşlığının vacibliyini qeyd edib.

P.Teyz vurğulayıb ki, Paraqvay da Azərbaycan kimi materikdaxili ölkədir. Odur ki, beynəlxalq dəniz və okeanlara birbaşa çıxışı olmadan sosial-iqtisadi inkişaf sahəsində Azərbaycanın təcrübəsini tətbiq etmək olar.

Qeyd edək ki, Azərbaycan dövlət müstəqilliyini bərpa etdikdən sonra respublikanın tədricən nəqliyyat qovşağına çevrilməsi üçün müvafiq tədbirlər görüb. Bu, Azərbaycana nəinki öz məhsullarını ixrac etməyə, həm də başqa ölkələrin öz mallarını və xidmətlərini ən çatımlı iqtisadi dəhliz olan Azərbaycandan nəql etməyə əlverişli imkan yaradır.