Avropa Şurası Parlament Assambleyasının (AŞ PA) qış plenar sessiyasının üçüncü iş günündə Azərbaycanın qurumdakı nümayəndə heyətinin sədri Səməd Seyidov Assambleyanın yeni sədri An Brasörlə görüşüb.

Görüşdən sonra jurnalistlərə açıqlama verən S.Seyidov qeyd edib ki, görüşdə Azərbaycan nümayəndə heyəti ilə AŞ PA arasında gələcək əməkdaşlıq məsələləri müzakirə edilib:

"Bilirsiniz ki, qış plenar sessiyasında xanım An Brasör Avropa Şurası Parlament Assambleyasının yeni prezidenti seçildi. Xanım Brasör bu posta seçiləndən dərhal sonra Azərbaycan nümayəndə heyətinin rəhbərini öz ofisinə dəvət etdi və gələcək əməkdaşlıq məsələlərini müzakirə etdi. Azərbaycan nümayəndə heyəti olaraq, An Brasörü AŞ PA sədri postuna seçilməsi münasibətilə təbrik etdik və öz əminliyimizi bildirdik ki, yeni sədr Azərbaycan-Avropa Şurası münasibətlərinin konstruktiv şəkildə inkişaf etməsinə dəstək verəcək və Azərbaycanın AŞ Nazirlər Komitəsinə sədrliyi ilə əlaqədar olaraq, lazım olan bütün dəstək və köməyini göstərəcək". (Trend)