Türkiyə ətrafında qurulan oyunlar demək olar ki, iflasa uğrayır.

Bu sözləri Axar.az-a açıqlamasında politoloq Qabil Hüseynli deyib. Sabiq dövlət müşavirinin sözlərinə görə, ərəb ölkələri, İran, Rusiya, hətta bəzi Avropa ölkələri daxilində Türkiyənin fəal xarici siyasətindən narahat olan qüvvələr fəallaşıblar:

"Məqsəd bu dinamıkanı dayandırmaq və Türkiyəni küncə sıxılmış vəziyyətdə saxlamaq, ölkə daxilində sabitliyi pozmaq, hətta müəyyən ərazilərini parçalamaqdır. Bütün son baş verənlər məhz buna hesablanıb. Son teraktlar PKK, DHKPC və digər terror təşkilatlarının əli ilə həyata keçirilir. Bu təşkilatların ideoloji platformaları fərqli olsa da, hədəflər eynidir. PKK-nın Nijni Novqorod ətrafında təlim düşərgələri, Moskvada isə nümayəndəlikləri var. Yəni Rusiya PKK-nı son zamanlar aktivləşdirir. Üstəlik, Suriya vasitəsilə rus ordusunun PKK-ya silah ötürməsi faktı da intensivləşir. Görünür, PKK-ya beynəlxalq himayə gücləndirilir. Adını çəkmirəm, burada başqa bir dövlət də himayəçilik edir. Bütün bunlara rəğmən, terrorçuların Türkiyə ərazilərindən təmizlənməsi prosesi tamamlanmaq üzrədir".

Q.Hüseynli qeyd edib ki, PKK terroru ilə bağlı artıq Avropada ikili standartlardan üzdöndərmə meyilləri baş qaldırır:

"Bu, birbaşa Türkiyənin PKK-ya qarşı fəaliyyətinə də sirayət edəcək. Bu yaxınlarda müəyyən nəticələrin şahidi olacağıq. Bununla yanaşı, Rusiya da Türkiyə ilə bağlı səylərini artırır. Moskva artıq müəyyən sanksiyaları geri çəkməyə, türk tikinti şirkətlərinə yeni sifarişlər verməyə başlayıb. Düzdür, turizm sahəsində qadağalar götürülməsə də, 3-cü ölkə vasitəsilə Türkiyəyə gedən rusların sayı artmaqdadır. Rusiyanın turizm şirkətləri isə bununla bağlı artıq hökumətə bildiriblər. Bu istiqamətdə dönüş ehtimalı yüksəkdir".