Azərbaycanda Fətullah Gülən hərəkatının davamçılarını tez-tez nurçular adlandırırlar. Lakin Gülən camaatı ilə nurçular arasında böyük fərq var.

Axar.az xəbər verir ki, ölkədə yaşayan nurçular Gülən camaatı ilə əlaqəli olmadıqlarını bildirir, media orqanlarında Gülən hərəkatından "nurçular" kimi bəhs edilməsini qəbuledilməz sayırlar. Redaksiyamıza müraciət edən Sumqayıt şəhər sakini Tahir Orucov uzun müddət mətbuatda əsassız məlumatların yayıldığını, insanlarda səhv fikir formalaşdığını deyir:

"Media orqanları nurçular haqqında ciddi araşdırma aparmadan qeyri-obyektiv informasiyalar yayır. Belə məqalələrin nəşr olunması "Risale-i Nur" əsərlərin Azərbaycandakı minlərlə oxucusuna hörmətsizlik kimi anlaşılır. "Risale-i Nur" kitabları bir əsrdən çoxdur ki, dünyanın müxtəlif ölkələrində nəşr edilir, oxunur. Əslində, yanlış olaraq "cərəyan" kimi tanınan nurçuluq islamın özündən başqa bir şey deyil. Hər kəs bu əsərlərdən oxuyub istifadə edə bilər. Heç bir ölkədə bu kitablar qadağan edilməyib. Nurçular heç vaxt siyasətə qarışmaz, dövlətinə, millətinə, vətəninə xəyanət etməzlər".

Nurçular adlandırılan kəsimin oxuduğu kitabların müəllifi Səid Nursidir. Nursi 1877-ci ildə, Türkiyənin şərqindəki kürd kəndlərindən birində anadan olub. Dünyəvi Türkiyə Cümhuriyyətinin ilk illərində o, kürd etirazlarında iştirak ittihamı ilə həbs edilərək Qərbi Anadolunun İsparta şəhərinə sürgün edilib. Ömrünün son illərində Səid Nursi ölkənin şərqinə qayıdıb və 1960-cı ildə Urfa şəhərində vəfat edib. Sürgündə və həbsdə keçirdiyi uzun illər ərzində o, 5 min səhifədən ibarət "Risale-i Nur" əsərini yaradıb. Sünni sufi ənənələrinə söykənməklə dünyanın müasir görüşünü sərgiləyən əsər Quran təfsiri ilə tanınıb. Səid Nursi yalnız Türkiyə yox, həm də Yaxın Şərqdə ən nüfuzlu ilahiyyatçılardan biri kimi tanınıb. Səid Nursinin vəfatından sonra onun davamçıları "dərsanə" adlanan oxu dərnəkləri yaratmağı, təfsirlərin öyrənilməsi və təbliğini davam etdiriblər. 1950-ci ildə çoxpartiyalı siyasi sistem yaradılana qədər, əsasən, gizli şəkildə fəaliyyət göstərən nurçular hərəkatı genişlənməkdə davam edib. Hərəkat birbaşa siyasi fəaliyyətdən kənar durub.

"Gülən hərəkatı" və yaxud "Gülən camaatı" kimi də tanınan gülənçilər isə bəzən "neo-nurçular" kimi də qəbul edilir. Onların əvvəllər nurçu ənənələrinə əsaslanan xarizmatik lideri – Fətullah Gülən hələ 1970-ci illərdə özü ilə nurçular arasına məsafə qoyub. O özünün hər hansı dini qrup və yaxud təriqətə aid olmasını qəbul etməyib.

Gülən icması Türkiyənin polis və ədliyyə kimi aparıcı dövlət institutlarında işləyəcək kadrlar yetişdirməklə fəaliyyətinə davam edib. Ədalət və İnkişaf Partiyasının (AKP) hakimiyyətdə olduğu illərdə yaxşı təhsil almış Gülən tərəfdarları müxtəlif dövlət və hökumət qurumlarında mühüm vəzifələrə təyin olunublar. Gülən hərəkatı öz təhsil müəssisələri, biznes və sivil cəmiyyət qurumları vasitəsi ilə beynəlxalq aləmdə geniş təmsil olunur.

"Camaat" hazırda Ərdoğan iqtidarı ilə açıq-aşkar müxalifətdədir və "dövlət içində dövlət" (parallel yapı) yaratmaqda, dövlətin dayaqlarını sarsıtmaqda ittiham edilir. Bunun sübutları ortaya qoyulduqca gülənçilərlə nurçular arasında uçurum daha da dərinləşir. Nurçular bu qarşıdurmada ya hökuməti dəstəkləyib, ya da neytral mövqe tutublar.

Nurçu və Gülən icmaları arasında mübahisə yaradan digər bir məsələ isə Səid Nursi əsərlərinin tərcüməsi və sadələşdirilməsi ilə bağlıdır. Belə ki, Nurçu icması liderlərinin etirazlarına məhəl qoymayan Gülən hərəkatı "Risale-i Nur" əsərinin bəzi hissələrini müasir türkçəyə çevirərək dərc edib. Bu da nurçuların etirazına səbəb olub.