Maydan hadisələrinin iştirakçılarından biri Yekaterina
Bolşakovanın kürəyinə "Berkut"un atdığı qumbara düşüb. Həmin günü
xatırlayaraq o öz feysbuk profilində hadisənin təfərrüatını
paylaşıb:
"Mən bilirdim hara gedirəm, niyə gedirəm və nə baş verə bilər.
Toqquşma başlayanda Berkutun qumbarası kürəyimə düşdü. Əslində, mən
ən sonda gedənlərdən idim. Yanımda da kömək etdiyim 75 yaşlı nənə
var idi. Belimdə yaxşı materialdan hazırlanmış çantam olmasaydı,
indi mən də yox idim.
Qumbara nəticəsində çantamın yalnız sağ çiyni qaldı. Sonra
nənəyə də kömək edib, kənardakı şam ağacının yanında dayandıq.
Yanımızdan isə berkutçular qaçırdı. Onlar qarşılarına çıxan hər
kəsi döyürdülər - qadınları, kişiləri, mətbuat işçilərini, qırmızı
xaçlıları. Bizi də dəyənəkləyə-dəyənəkləyə, "öldürəcəm, qancıq",-
deyə, qışqırırdılar. Mən isə sakitcə onların düz gözünün içinə
baxırdım və nədənsə onda dəyənəyi aşağı salırdılar. Daha sonra
berkutçulardan biri nənəylə məni qalxanın himayəsi altında
yaxınlıqdakı əraziyə apardı. Orada 30-a yaxın adam var idi.
Onlardan təxminən 13-ü qadın, 6-7 nəfəri kişi, qalanı isə media
nümayəndələriydi. Ordakı mənzərə sözlə deyiləsi deyil. İki nəfər
başından yaralandığından üzləri büs-bütün qan içində idi.
Qadınlardan müxtəlif dərəcəli xəsarət alanlar da vardı. Mən hələ
kürəyimdəki yaradan xəbərdar deyildim. Bir neçə dəqiqədən sonra
Berkut yenidən "ov dalınca" getdi. Yaxşı ki, Qırmızı Xaçdan olan
qızın çamadanı yanında idi. O, axan qanların qarşısını almağa
çalışırdı. Bəzilərinə bir neçə iynə də vurdu.
Biz qalan 16 nəfərlə blokda gizləndik. Mən yaxınlarıma zəng
edərək köməyə ehtiyacımız olduğunu bildirdim. Yanımdakı KİV
nümayəndələri də öz yaxınlarına zəng edirdi. Nəticədə, Maydandan
kömək üçün Qırmızı Xaç gəldi və möcüzə kimi görünsə də, Sergey də
maşınla gəlib çata bildi. Orda olan hər kəsə tibbi yardım
göstərildi. Bir neçə dəqiqədən sonra mən artıq evdə idim.
Həmin günün əsas təəssüratlarından nəticəyə gəlib onu deyə
bilərəm ki, burdakı hadisələri xəbərlərdən izləmək başqadır,
berkutçuların düz gözünün qarşısında insanları vəhşicəsinə
döymələri tam başqa.
Bu gün mən öldüm və yenidən doğuldum.