Təbriz şəhərinin yaxınlığındakı Həştərudun 20 km cənub-şərqində, Narınqala məntəqəsində yerləşən Zühak qalası dağılma təhlükəsi ilə üz-üzədir.

Kult.az xəbər verir ki, bu barədə ətraf mühitin mühafizəsi ilə məşğul olan Yasin Kasibi İSNA-ya müsahibəsində deyib. Onun sözlərinə görə, Zühak qalası tarixi məkan olmaqla yanaşı, ətrafındakı nadir bitki və canlılar baxımından da çox önəmlidir, lakin Təbiəti Qoruma və Meşələr İdarəsi bura diqqət ayırmır:

“Zühak qalasının ətrafında geniş sahə mövcuddur. Bu ərazidə park və gözəl istirahət mərkəzi yaratmaq mümkündür. Bununla da tarixi abidəni gecə-gündüz qorumaq mümkün olar. Hazırda Zühak qalası heç bir mədəni qurum tərəfindən qorunmur. Yaz və yay mövsümlərində çobanlar öz heyvanlarını otarmaq məqsədi ilə qalanın ətraf ərazilərinə gətirir. Bununla da qala məhv edilir”.

Qeyd edək ki, iki təpədən və onların arasındakı çökəkdən ibarət olan Zühak qalası Əhəmənilərə qədərki dövrdən İslam zamanınadək müxtəlif vaxtlarda tikilmiş qurğuları özündə ehtiva edir.