Şərqi Azərbaycan vilayətinin Mədəniyyət və İrşad İdarəsinin baş katibi Məhəmməd Məhəmmədpur Azərbaycan türkcəsində müxtəlif ləhcələrdə işlənən sözlərin eyniləşdirilməsi (ədəbi dil yaradılması istiqamətində ilk addım – red.) və Azərbaycanın yeni ensiklopediyasının yazılmasına başlandığını bildirib.

Bu barədə Kult.az-a Şərqi Azərbaycan vilayətinin Mədəniyyət və İrşad İdarəsinin ictimai əlaqələr şöbəsindən məlumat verilib. İdarədən bildirilib ki, bu sahədə aparılan fəaliyyət Şərqi Azərbaycan valisi və vilayətin ziyalıları tərəfindən dəstəklənir:

“Ötən illərdə bu sahədə bir çox faydalı işlər görülüb və bütün işlərimiz vali və ziyalılar tərəfindən dəstəklənib”.

Mədəniyyət və İrşad naziri, Şərqi Azərbaycan vilayətinin valisi və bir sıra ziyalıların Azərbaycan Mədəniyyət, incəsənət və ədəbiyyat mərkəzində görüşü zamanı Məhəmməd Məhəmmədpur bildirib ki, prezidentin dillə bağlı vədlərinin yerinə yetirilməsi ilə bağlı mərkəz Təbrizdə fəaliyyətə başlanılıb və bir sıra müsbət işlər görülüb. Onun sözlərinə görə, Mərkəz Təbrizdə Pərvin Etisaminin tarixi evində yerləşir və yaranan gündən davamlı olaraq müxtəlif iclaslar keçirərək Azərbaycan dili, mədəniyyəti və incəsənətinin inkişafı ilə bağlı bir çox layihələr hazırlayıb.

Azərbaycan Mədəniyyət, incəsənət və ədəbiyyat mərkəzinin müdiri Əli Məhəmmədi mərkəzin fəaliyyəti haqqında məlumat verib:

“Bir çox ziyalı, tarixşünas və universitetlərin araşdırmaçılarının iştirakı ilə “Azərbaycan valiləri” kitabı hazırlanıb və bir aya çap olunacaq. Həmçinin Azərbaycan ziyalıları və alimləri barədə də ensiklopediyanın hazırlanmasına başlanılıb. Bu il ərzində Azərbaycan dili və tarixi mövzusunda beynəlxalq forum da keçiriləcək”.