"UEFA-nın qərarından narazı olduğumuz üçün apelyasiya şikayəti etdik. Şikayətimizə fevralın 19-da baxılacaq".

Bu sözləri APA-ya açıqlamasında "Qarabağ" klubunun icraçı-direktoru Əmrah Çəlikəl deyib.

Avropa Liqasının qrup mərhələsi çərçivəsində keçirilən "Qarabağ" – "İnter" matçında sayılmayan qola görə UEFA-ya şikayət edən Ağdam klubu müsbət cavab almayıb. Nəticədə apelyasiya şikayəti ediblər.

Çəlikəlin sözlərinə görə, onlar bu məsələdə sona qədər gedəcəklər:

"Biz əlimizdən gələni edirik. UEFA-nın mövqeyini gördük. Onlar hakimə haqq qazandırmağa çalışırlar. UEFA böyük qurumdur, amma onların hakimi cəzalandırmamaqları bizim üçün sürpriz oldu.

Düzdür, bu qurum öz qərarları ilə bağlı açıqlama vermir. Yəni hakimi gizli şəkildə də cəzalandıra bilərlər".

Çəlikəl apelyasiya şikayətindən müsbət cavab çıxmayacağı halda, FİFA-ya müraciət edəcəklərini bildirib.