Bu gün Avropa Çempionatının seçmə mərhələsinin H qrupunda V turun oyunları keçiriləcək.

Axar.az-ın məlumatına görə, millimiz Tofiq Bəhramov adına Respublika stadionunda Malta ilə qarşılaşacaq. Qrupda 4 oyun keçirən yığmamızın aktivində hələ ki, xal yoxdur. Əvvəlki 4 görüşdə meydanı məğlub tərk edən komandamız ilk qələbəsinə sevinə bilər. Bu uğursuzluğun 3-ü Berti Foqtsun, 1-i isə Mahmud Qurbanovun başçılığı altında olub.

"Cırtdan" ölkə təmsilçisi ilə görüş xorvatiyalı baş məşqçimiz Robert Prosineçki üçün də əlamətdardır, çünki təcrürbəli çalışdırıcı bu postda millimizi ilk oyuna çıxaracaq. 46 yaşlı çalışdırıcı goal.az-a müsahibəsində sələfi Berti Foqtsun fəaliyyətini yüksək dəyərləndirib: "Berti Foqts son 6 ildə burda xeyli yaxşı iş görüb. Çoxları onun uğursuz olduğunu düşünür. Ancaq heç də belə deyil. Foqts irəliləyişə nail olub. Bununla belə, biz təfəkkürü dəyişməliyik".

***

"Prosineçkinin tələb etdiyi futbol bizə uyğundur. Səbirsizliklə oyunu gözləyirik. Hamı çox istəklidir. Asan keçməyəcək".

Bu sözləri millimizin kapitanı Rəşad Sadıqov mətbuat konfransında deyib. O, rəqibin Gürcüstanla yoxlama matçını izlədiklərini söyləyib:

"Malta çox yaxşı müdafiə olunur. Azarkeşləri səbirli olmağa çağırıram. Gürcüstan millisi 25 dəqiqə ərzində Maltaya bir zərbə vura bilmədi. Sabah biz də çətinliklə üzləşə bilərik. Bilirik ki, daha çox müdafiədən oynayırlar".