18-19 aprel tarixlərində Kikboksinq Federasiyası XXI Azərbaycan çempionatı keçirəcək.

Bu barədə Axar.az-a Kikboksinq Federasiyasından məlumat verilib.

Məlumata görə, çempionat Azərbaycan Respublikasi Gənclər və İdman Nazirliyinin vahid idman təqvim planına əsasən Sərhədçi Olimpiya Kompleksində keçiriləcək.

Əsas məqsəd 2015-ci ildə dünya, Avropa çempionatının beynəlxalq və peşəkarlar arasında turnirdə iştirak edəcək milli komandanın tərkibini müəyyənləşdirməkdir. Yarışa iki yaş qrupu üzrə idmançı qatılacaq. Yarışmalar aprel ayının 18-də, yarımfinal və final döyüşləri isə aprel ayının 19-da baş tutacaq.

Məsələ ilə bağlı jurnalistlərin suallarını cavablandıran Azərbaycan Kikboksinq Federasiyasının prezidenti, millət vəkili Adil Əliyev artıq belə yarışların mütəmadi olaraq keçirildiyini təşkil söyləyib:

"Məqsəd belə tədbirlərlə gənclər arasında idmanın inkişafına dəstək olmaq və idmanın kütləviliyini təmin etmək, xüsusilə gənclərdə vətənpərvər ruhunu gücləndirmək, narkomaniyaya yox demək və gənclərin pis vərdişlərdən uzaq durmasıdır. Cənab prezidentin idman siyasətinə dəstək olaraq belə yarışları müntəzəm olaraq keçirməyi planlaşdırırıq".