“İnter”in baş məşqçisi Simone İnzaqi və yarımmüdafiəçisi Hakan Çalhanoğlu mafiya əlaqələri ittihamı ilə 1 oyunluq cəzalanıb.

Axar.az Publika.az-a istinadən xəbər verir ki, bundan əlavə, onlar cərimə də ödəyəcəklər.

Mənbənin bildirdiyinə görə, araşdırma zamanı İnzaqi və Çalhanoğlunun 2023-cü ildə Çempionlar Liqasının “Mançester Siti”yə qarşı keçiriləcək final oyununa əlavə biletlərin paylanması ilə bağlı mafiya ailələrinə bağlı ultra üzvlə əlaqə saxladığı müəyyən edilib.

Ötən ilin sentyabrında “İnter”in bir neçə azarkeşi, eləcə də “Milan” azarkeşləri hədə-qorxu ilə pul tələb etməkdə və digər qanun pozuntularında şübhəli bilinərək həbs edilmişdilər. Bu azarkeşlərin də mafioz ailələrə bağlı olduğu və futbol sənayesi ilə bağlı cinayətlər törətdikləri vurğulanır.

İstintaqla məşğul olan “İnter” və “Milan” prokurorluqla sövdələşməyə qərar verib. Bu halda “neradzurri” 70 min avro, “rossoneri” isə 30 min avro cərimə ödəyəcək. İnzaqi 15 min avro, Çalhanoğlu isə 30 min avro cərimələnib. Onlar A Seriyasının 35-ci turunun “Verona” ilə oyununu (3 may) buraxacaqlar.