Çox xoş oldu, gözəl ab-hava vardı. Nəticədən öncə buradakı atmosfer çox cəlbedici idi.

Axar.az Teleqraf-a istinadən xəbər verir ki, bunu "Qarabağ"ın baş məşqçisi Qurban Qurbanov Azərbaycan millisinin Bakıda keçirilən minifutbol üzrə dünya çempionatında Rumıniyaya qalib gəldiyi 1/8 final oyunu barədə danışarkən deyib.

53 yaşlı mütəxəssisin sözlərinə görə, bu, bir daha Azərbaycanda futbola marağın olduğunu və bu minifutbolun da sevildiyini göstərir: "Sadəcə, azarkeşləri bir az da fəallaşdırmaq lazımdır. Əlbəttə, onları öz oyunumuzla, işimizlə cəlb etməliyik".

O, son dünya çempionu üzərində qələbəni çox fantastik adlandırıb: "Bu, futbolda final oyununa bərabər idi. Penalti seriyasında qalibiyyət əldə etdik. Oyundan çox həzz aldım".

Qurbanov bildirib ki, Azərbaycan millisinin dünya çempionluğunu yalnız arzu etmək olar:

"Əlbəttə, bir az üstünlük var. Amma bu, idmandır. Burada istənilən nəticə ola bilər. İkinci oyundur bura gəlirəm. Hiss olunur ki, futbolçularımızda həyəcan var. İlk dəfədir Bakıda belə bir yarış keçirilir. Fürsətdən istifadə edərək, Azərbaycan Minifutbol Federasiyasının prezidenti Orxan Məmmədova təşəkkürümü bildirmək istəyirəm. Bəlkə hamı bu yarışa "kiçik" baxır. Amma ümumi götürsək, təşkilatçılığı, minifutbola marağı, azarkeşlərin belə bir inamını böyük futbolda da görməyi çox istərdim".

Baş məşqçi bu cür azarkeş dəstəyinin "Qarabağ"ın avrokubok oyunlarında da olduğunu vurğulayıb:

"Ola bilsin, çempionat matçlarında azarkeş dəstəyi zəifdir. Ümidvaram ki, o da olacaq. Bu gün 4-5 min azarkeşi belə bir gözəl arenaya yığmaq olursa, gələcəkdə stadionlara da cəlb etmək mümkündür. Onları gözləyəcəyik. Futbolda hər bir komandanın öz azarkeşi olur. Bəzi azarkeşlər, fanatlar nəticəyə görə yox, öz komandalarından ötrü gəlirlər. Biz bir tərəfdən uduzuruqsa, digər tərəfdən udsaq, bəzi problemlərimiz azalar. Azarkeşlər stadionlarda olsalar, bizə dəstək, futbolçulara güc verərlər. O problemlər həll olunsa, digərləri də həll olunacaq".