Ana səhifə İqtisadiyyat |
"Elman müəllimin düşüncəsi o olub ki, bu barədə tez-tez danışaraq, açıqlama verərək insanlarda panika havası yaratmasın".
Bu sözləri Axar.az-a açıqlamasında iqtisadçı-ekspert Natiq Cəfərli Mərkəzi Bankın İdarə Heyətinin 2014-cü ilin yekunlarına həsr olunmuş iclasında bağlanacaq banklarla bağlı məlumatın verilməməsinə münasibət bildirərkən dedi. Onun sözlərinə görə, məlumatın gecikdirilməsi insanlar arasında panika yaradır:
"Mərkəzi Bank əslində, bir neçə dəfə prosesin getdiyi ilə bağlı açıqlama yayıb. Bu açıqlamalar insanlarda müəyyən gözləntilər və suallar doğurmuşdu. Son açıqlama da ondan ibarət idi ki, beş bank ya bağlanacaq, ya da təmərküzləşərək iri banklara birləşəcək. Çünki sözügedən banklar nizamnamə kapitalını 50 milyon manata çatdıra bilməyib. Bununla bağlı rəsmi açıqlama var idi. Çox yaxşı olardı ki, Elman Rüstəmov və onun komandası rəsmi şəkildə tez-tez açıqlamalar verərək insanları sakitləşdirərdi. Çünki bu tip açıqlamalar ajiotaja, şayiələrin yaranmasına səbəb olur. Bu da bank sferası üçün heç də yaxşı hal deyil. Əslində, Elman müəllimin düşüncəsi o olub ki, bu barədə tez-tez danışaraq, açıqlama verərək insanlarda panika havası yaratmasın. Ona görə də MB rəhbəri gec-gec, nadir hallarda bu məsələyə münasibətini bildirir. Amma dünya praktikası göstərir ki, seçilmiş bu yol düzgün deyil. Əksinə, daha detallı, ətraflı şəkildə ictimaiyyət bilgiləndiriləndə daha az fəsadlar doğurur və insanlarda həmin panika havasının yaranmasına səbəb olmur".
Ekspertin sözlərinə görə, qərar qəbul olunma mexanizminin və banklarda yaranmış təhlükənin açıqlanması vətəndaşları arxayınlaşdıracaq:
"Ona görə də, çox yaxşı olardı ki, MB proseslə bağlı doğru-düzgün açıqlamalar versin. MB-ın açıqlamasına görə, yanvarın 1-də proses bitməli idi. Artıq bir aydan da çox vaxt keçir. Buna görə də banklarla bağlı qərarların qəbul olunması, qərar qəbul olunma mexanizmlərinin həyata keçirilməsi və banklarda yaranan təhlükələr barədə məlumatın verilməsi daha düzgün addım olardı. Susqunluq və məlumatsızlıq bu barədə şayiələrin artmasına səbəb olur".
Xatırladaq ki, bir neçə gün öncə MB-nin İdarə Heyətinin 2014-cü ilin yekunlarına həsr olunmuş geniş iclası keçirilib. İclasda ölkənin strateji valyuta ehtiyatları, ümumi iqtisadi artım, bank aktivləri, İpoteka Fondunun, Maliyyə Monitorinqi Xidmətinin, eləcə də MB-nin ərazi idarələri və regional mərkəzlərinin fəaliyyəti ilə bağlı müzakirələr aparılıb.
Tarix
2015.02.04 / 11:10
|
Müəllif
Şəmsəddin Ənsar
|