Elə zəif əsərlər var ki, haqqında bəlağətli ifadələrlə zəngin ön sözlər yazılıb.

Bu sözləri tənqidçi Vaqif Yusifli kitablara "Ön söz" yazma ənənələrinin getdikcə sıradan çıxması ilə bağlı Axar.az-a danışarkən deyib. Onun fikrincə, "Ön söz" yazıçı ilə oxucu arasında rabitə qurmaq baxımından faydalıdır:

"XX əsrin əvvəllərindən bəri istər yaşlı yazıçıların, istərsə də gənclərin kitablarına ön söz yazılması ənənə şəklini alıb. Azərbaycanda ən çox "Ön söz" yazanlardan biri də mənəm. Bu, daha çox mənim istəyimlə olmur, tanınmış tənqidçi kimi, ədəbiyyatı duyan bir adam, bir mütəxəssis kimi mənə müraciət edirlər.

"Ön söz" kitabın mahiyyəti, həmin kitabı yazan müəllifin yaradıcılıq yolu haqqında əvvəlcədən verilən məlumatdır. Oxucu kitabın bədii hissəsi ilə tanış olmamış onun haqqında məlumatı oxuyur, bir növ, özü üçün müəyyənləşdirir ki, bu kitabı oxumalıdır, ya yox. Amma bunu da hamısına aid etmək olmaz, elə ön sözlər var ki, o həmin kitab haqqında dəqiq, operativ məlumat vermir. Elə zəif əsərlər var ki, haqqında bəlağətli ifadələrlə zəngin ön sözlər yazılıb.

Kitaba "Ön söz" yazmaq lazımdır. Bir şərtlə ki, yazıçıya, kitaba kömək eləsin, oxucu ilə yazıçı arasında rabitə yaratsın, yazıda təhrif olmasın, yoxsa bu, həm kitabı, həm də ön söz müəllifini gözdən sala bilər.

Kamal Abdullanın kitabına Aqşin Yenisey "Ön söz" yazıb. Aqşin çox istedadlı, ədəbiyyat haqqında fərqli düşünən şairdir. Əgər Aqşin Yeniseyin də Kamal Abdullanın kitabına ön söz yazması müəllifin öz istəyi ilə olubsa, demək, Kamal Abdulla onu fikir, düşüncə adamı hesab edir. Hərçənd ki, Aqşin Yeniseyin çox fikri mənim xoşuma gəlmir".