Yeni ildə dünyada ən çox dinlənilən mahnı ABBA qrupunun ifasında səslənən "Happy New Year!" (Yeni iliniz mübarək!) mahnısıdır.

Kult.az xəbər verir ki, bu mahnı ABBA qrupunun 1980-ci ildə satışa çıxardığı albomda yer alıb.

42 il keçməsinə baxmayaraq, hər il milyonlarla dinləyici qazanan mahnının ifaçıları Aqneta Feltskoq, Anni-Frid Linqstad, Byorn Ulveus və Benni Anderssondur. Mahnının orijinalı Yutubda 72 milyon baxış qazanıb.

Qeyd edək ki, İsveçin məşhur pop-rok qrupu olan ABBA 1972-1982-ci illərdə fəaliyyət göstərib. Qrupun adı üzvlərin adlarının baş hərflərindən yaranıb. Dünya üzrə qrupun 350 milyon albomu satılıb. ABBA 1974-cü il “Avroviziya” mahnı müsabiqəsinin qalibi olub. ABBA heç vaxt öz fəaliyyətini dayandırdığını rəsmən bəyan etməyib. Amma qrup artıq uzun müddətdir ki, dağılmış hesab edilir. Onların qrup halında son çıxışları 11 dekabr 1982-ci ildə Britaniya telekanalının efirində olub.