Kamçatkada baş vermiş zəlzələnin Rusiyanın digər bölgələrinə təsiri olmayacaq.

Axar.az xəbər verir ki, bu barədə M.V.Lomonosov adına Moskva Dövlət Universitetinin Geologiya fakültəsinin böyük elmi işçisi İlya Bolşakov bildirib.

"Kamçatka və Kuril adaları Rusiyanın Sakit okean odlu halqasına daxil olan hissəsidir. Bu, okean plitəsinin materik plitəsinin altına girdiyi subduksiya zonasına aiddir. Kamçatkada baş verən zəlzələnin Rusiyanın digər bölgələrinə, o cümlədən Şimali Qafqaz və cənub bölgələrinə heç bir təsiri olmayacaq. Çünki bu bölgələr bir-birindən çox uzaqda yerləşir və onların tektonik vəziyyətləri də əhəmiyyətli dərəcədə fərqlənir. Bu halda birinin digərinə təsir göstərməsi mümkün deyil", – Bolşakov vurğulayıb.

O xatırladıb ki, yarımadadakı yeraltı təkan 1952-ci ildə baş vermiş və fəlakətli Şimali Kuril sunamisini törətmiş zəlzələdən sonra ən güclüsüdür.

Qeyd edək ki, ötən gün Kamçatkada 8,7 bal gücündə zəlzələ olub.