İranda 2025-ci ilin dekabrında başlayan kütləvi etiraz aksiyalarından sonra hökumət əhalinin əsas qida məhsullarına çıxışını təmin etmək üçün "Kalabarg" adlı elektron kupon tətbiqinə başlayıb. Bu addım yüksək inflyasiya və ərzaq qıtlığı ilə mübarizə məqsədi daşıyır.

Axar.az Milli.az-a istinadən xəbər verir ki, "Kalabarg" sistemi vətəndaşlara süd, pendir, yağ, düyü, ət və yumurta kimi 11 əsas qida məhsulunu daha ucuz qiymətə almağa imkan verən rəqəmsal kart sistemidir. Bu sistem vasitəsilə dövlət birbaşa vətəndaşın kartına kredit və ya rəqəmsal sənəd şəklində dəstək təyin edir.

İran rəsmiləri bildirirlər ki, tətbiq sayəsində əvvəllər market rəflərində tapılmayan bəzi məhsullar yenidən satışa çıxarılıb və qiymətlərdə qismən enmə müşahidə olunur. Lakin xalq bu dəyişikliklərə ehtiyatla yanaşır.

Bəzi vətəndaşlar bu dəstəyin faydalı olduğunu, lakin qiymət artımının qarşısını almaq üçün kifayət etmədiyini deyir.

Hökumət qiymətləri sabit saxlamaq üçün "güzəştli valyuta məzənnəsi" sistemində də dəyişiklik edib. Əvvəllər idxalçılara ucuz dollar verilirdi ki, məhsullar bazara ucuz daxil olsun. Lakin bu sistem korrupsiya və sui-istifadə hallarına yol açdığı üçün hökumət indi birbaşa istehlakçıya (xalqa) elektron kuponlar vasitəsilə dəstək verməyə üstünlük verir.