İranın Parsabad şəhərində itkin düşən yeddi yaşlı Atena Aslaninin meyiti bir ay axtarışdan sonra şübhəlilərdən birinin evinin qarajında tapılıb.

Axar.az İran mediasına istinadən xəbər verir ki, azyaşlının meyiti tibbi ekspertiza məqsədi ilə götürülüb. Rəsmilərin açıqlamalarına görə, hadisə ilə bağlı yaranan cinayət və axtarış qrupu bir ay gərgin fəaliyyətdən sonra hadisəni törədən şəxsi tapmağa müvəffəq olub.

Qeyd edək ki, bir ay əvvəl Atena Aslanı öz atasını görmək üçün evdən çıxıb. Həmin gündən azyaşlı qızın taleyindən xəbər almaq mümkün olmayıb. Hadisənin necə və nə məqsədlə törədilməsi barədə məlumat verilmir.

Qatilin tapılmaması Parsabadda əhalinin ciddi narazılığına səbəb olmuşdu. Atenanın meyiti tapılandan sonra əhali cinayətkarın ciddi şəkildə cəzalandırılmasını və edam edilməsini tələb edib. Dünən minlərlə Parsabad sakini küçələrə tökülərək hadisəni törədənə qarşı öz nifrətini bildirib. Şəhər polisi və baş prokuror əhalini sakitliyə çağırsa da, gecə saatlarına qədər əhali küçələrdə qalıb.