Ukrayna Daxili İşlər Nazirliyi başda "Birinci kanal"ın Baş direktoru Konstantin Ernst olmaqla 300 rusiyalı jurnalistin Avropa Birliyinə səfərlərinin qarşısının alınması təşəbbüsü ilə çıxış edəcək.

Axar.az-ın Ukrayna mediasına istinadən xəbərinə görə, bu barədə keçirdiyi brifinqdə Daxili İşlər nazirinin köməkçisi Anton Qeraşenko məlumat verib. Onun sözlərinə görə, hazırda Xarici İşlər Nazirliyinə müraciət etməyə hazırlaşırlar. Məqsəd odur ki, sözügedən qurum Avropa Birliyinə müraciət etsin və xəbərləri yanlış istiqamətə yozan rusiyalı jurnalistlərin tanınması, həmçinin onların cəzalandırılmasını gündəmə gətirsin.

Qeraşenko diqqətə çatdırıb ki, ələlxüsus son günlər guya ukraynalı əsgərlərin dinc sakinlərə qarşı işgəncələr verməsi süjetlərinin Rusiya telekanallarında efirə getməsi Ukrayna Daxili İşlər Nazirliyinin səbr kasasının daşırıb. Bu üzdən belə addım atmaq məcburiyyətində qalıblar.