Misir dövləti çoxlu sayda fələstinlinin öldürülməsində məhz HƏMAS-ı günahkar hesab edib.

Axar.az xəbər verir ki, Misir mətbuatı müharibəni dayandırmağa tam imkan olduğu halda, HƏMAS qruplaşmasının İsraildən fərqli olaraq sülh əvəzinə müharibəni seçdiyini yazıb:

"İsrail Silahlı Qüvvələri yerüstü əməliyyatların həyata keçirilməsinin qarşısını almaq üçün əlindən gələni etsə də, HƏMAS başqa seçim imkanı vermədi".

İsrail mətbuatı isə bunu xüsusi vurğulayıb:

"Ən maraqlısı odur ki, Misir öz bəyanatında bir dəfə də olsun İsraili tənqid etməyib. Misir kimi regionda aparıcı mövqeyə malik ölkələrdən birinin İsraili dəstəkləməsi onu göstərir ki, HƏMAS təşkilatı bütün sərhədləri aşıb".

Bu arada Misirin Xarici İşlər naziri sərhəddə yerləşən və HƏMAS üçün strateji rol oynayan Rafiyah keçidinin bağlanması barədə danışıb:

"Rafiyah sərhədyani keçidi Misirin sərhədidir və HƏMAS buranın nə zaman açılmalı, nə zaman bağlanmalı olduğu barədə Misirə göstəriş verə bilməz!"

Qeyd edək ki, bəzi ekspertlər Misirin bu mövqeyini HƏMAS-a qarşı aparılan yerüstü əməliyyat barədə İsraillə anlaşmanın olması kimi izah edirlər.