Kremlin mətbuat katibi Dmitri Peskov Rusiyanın ən qısa müddətdə Ukraynaya canlı qüvvədən ibarət yardım göndəriləcəyini açıqlayıb.

Axar.az xəbər verir ki, Kreml rəsmisi humanitar yardım göndərilməsi mövzusunda Ukraynadan daha məhsuldar əməkdaşlıq gözlədiklərini söyləyib:

"Rusiya Prezidenti Vladimir Putin və Ukrayna Prezidenti Pyotr Poroşenkonun təkbətək görüşündə humanitar yardım mövzusunda razılıq əldə olunub. Yardımı dərhal göndərə bilmərik. Beynəlxalq Qızıl Xaç Təşkilatının dəstəyi ilə Ukrayna ilə əməkdaşlıq edəcəyik".

Xatırladaq ki, Rusiya ötən günlərdə qarşıdurmaların davam etdiyi Ukraynanın şərqinə 280 yük maşınından ibarət humanitar yardım göndərmişdi. Göndərilən yardımların arasında 400 ton taxıl, 100 ton şəkər, 62 ton uşaq qidası, 54 ton dərman preparatı, 12 min yataq dəsti və 69 ədəd elektrik generator olub. Ukrayna isə yardım adı altında separatçılara silah daşındığını iddia edir.