14:34

Moskvada Liviyadakı situasiya ilə bağlı Rusiya-Türkiyə danışıqları başlayıb.

Axar.az xəbər verir ki, bu barədə məlumatı Rusiya Xarici İşlər Nazirliyinin rəsmi nümayəndəsi Mariya Zaxarova öz Feysbuk səhifəsində paylaşıb. O, görüşdə xarici işlər və müdafiə nazirlərinin iştirak etdiyini bildirib.

Nazirlərin görüşündən sonra Liviya nümayəndə heyətlərinin görüşə qatılacağı vurğulanıb.

Qeyd edək ki, bu gün Liviya Milli Ordusunun rəhbəri Xəlifə Haftar və Liviya Milli Razılıq Hökumətinin başçısı Fayez Sərrac Moskvaya səfər edib.

***

Moskvada Liviya Milli Razılıq Hökumətinin baş naziri Fayez Sərrac və Liviya Milli Ordusunun rəhbəri, marşal Xəlifə Haftar arasında keçirilən görüş 6 saata yaxındır davam edir.

Report-un məlumatına görə, görüş Rusiya və Türkiyənin xarici işlər və müdafiə nazirlərinin vasitəçiliyi ilə baş tutub.

Görüşün sonunda Liviyada atəşkəsin elan olunması ilə bağlı tərəflər arasında razılaşma imzalanması gözlənilir.

Eyni zamanda Rusiya və Türkiyənin xarici işlər və müdafiə nazirlərinin birgə mətbuat konfransı baş tutacaq.

Qeyd edək ki, ötən həftə Türkiyə prezidenti Rəcəb Tayyib Ərdoğan və Rusiya prezidenti Vladimir Putin Liviyadakı bütün tərəfləri yanvarın 12-si saat 00:00-dan etibarən döyüşləri dayandırmağa çağırıblar. Bundan sonra marşal Xəlifə Həftarın rəhbərlik etdiyi Liviya Milli Ordusu və Liviya Milli Razılıq Hökuməti atəşkəs elan ediblər.