Danimarkada millət vəkili seçkisindən sonra ən çox səs toplamasına baxmayaraq, hökumət qura bilməyən Baş nazir Helle Torninq-Şmidt Sosial Demokratlar Partiyası başçılığından istefa verdiyini açıqlayıb.

Axar.az xəbər verir ki, Şmidt istefasını məclisdə açıqlayıb.

Helle Torninq-Şmidt lider olmaq üçün hər zaman əlindən gələni etdiyini bildirib:

"Ancaq liderlik həm də doğru zamanda geri çəkilməkdir. Bu zaman isə indidir. İstefa verirəm və partiyamıza yeni bir başçı gələcək. Mən ilk qadın baş nazir idim, ancaq sonuncusu olmayacağam".

Danimarkanın yeni baş naziri olması gözlənilən Venstre Partiyasının lideri Lars Lokk Rasmussen isə Şmidtdən sonra məclisə gələrək partiyaya səslənib. Rasmussen danimarkalıların seçkidə yeni bir hökumət istədiyini dilə gətirib:

"Dörd il əvvəl baş nazirlik ofisinin açarlarını təhvil vermişdik, ancaq mən bunların borc olaraq verildiyini söyləmişdim".

Qeyd edək ki, Helle Torninq-Şmidt 2013-cü ilin dekabrında Nelson Mandelanın cənazə mərasimindəki səhnə ilə də xatırlanır. Bir çox dünya liderinin iştirak etdiyi mərasimdə Danimarkanın Baş naziri Helle Torninq-Şmidt, ABŞ Prezidenti Obama və İngiltərə Baş naziri Kemeronun yayılan görüntüsü geniş müzakirələrə səbəb olmuşdu.

Helle Torninq-Şmidt telefonunu çıxararaq Obama və Kemeron ilə gülümsəyərək şəkil çəkdirmişdi. Ancaq Mişel Obamanın vəziyyətdən narahatlığı da diqqətdən yayınmamışdı.