ABŞ Prezidenti Barak Obama terrorçu qrupların girov götürdüyü amerikalılarla bağlı siyasətdə dəyişiklik etdiklərini açıqlayıb.

Axar.az xəbər verir ki, ABŞ prezidenti bununla bağlı Ağ Evdə çıxış edib.

Obama ABŞ hökumətinin bundan sonra terrorçularla danışıqlar aparmağa çalışan və qohumlarının azad edilməsi üçün pul ödəmək istəyən ailə üzvlərini cəzalandırmaqla hədələməyəcəyini açıqlayıb.

Hökumət şəxslərin terrorçularla ictimaiyyət və özəl şəxslər vasitəsilə əlaqə saxlamaq səylərinə kömək edəcək.

11 sentyabr 2001-ci il hadisələrindən sonra terrorist qrupların 80-dən çox amerikalını girov götürdüyünü söyləyən Obama onların ölkələrinə etibarlı şəkildə geri gətirilməsi üçün əllərindən gələn hər şeyi edəcəklərini bildirib:

"Amerikalı girovların evlərinə təhlükəsiz şəkildə dönməsi ən böyük prioritetimizdir. ABŞ rəhbərliyinin terror qruplarına pul ödəmək kimi güzəştlər etməyəcəyini deyə bilərəm. Bu, ictimaiyyətdə müzakirələrə səbəb ola bilər. Girovların yaxınları bu mövzuda olduqca həssasdır. Mən də buna yalnız başçı olaraq deyil, eyni zamanda bir yoldaş və ata olaraq baxıram. Əgər mənim ailəm təhlükədədirsə, onları geri qaytarmaq üçün hər şeyi edərdim. Hökumətin terroristlərə pul ödəməsi daha çox amerikalını təhlükəyə atmaqdır və bununla da, dayandırmaq istədiyimiz terrorizmə dəstək verməkdir. Hazırkı siyasətimiz sonunda amerikalıların təhlükəyə daha az düşməsinə yönəlib".