Belarus hökuməti Qərbin sanksiyalarına cavab olaraq ərzaq embarqosu tətbiq edilən ölkələrin siyahısını genişləndirib.

Axar.az xəbər verir ki, hökumətin qərarına əsasən, ərzaq embarqosu qoyulan ölkələrin siyahısına Lixtenşteyn və Serbiya da əlavə edilib.

2022-ci il yanvarın 1-dən Belarus ona qarşı qeyri-dost siyasəti yürüdən ölkələrdən ərzaq malları idxalına qadağa qoyub. Embarqo ilə əlaqədar bütün sərhəd perimetri üzrə gömrük nəzarəti gücləndirilib.

Siyahıya təxminən 20 maddə daxildir. Onların sırasında mal və donuz əti, süd və süd məhsulları, meyvə və qoz-fındıq, kolbasalar, qənnadı məmulatları, tərəvəz var.

Qeyd edək ki, daha öncə sözügedən siyahıya Avropa İttifaqı ölkələri, ABŞ, Kanada, Albaniya, Böyük Britaniya, İslandiya, Norveç, Şimali Makedoniya, Monteneqro və İsveçrə daxil edilmişdi.