Livanın Baş naziri Nəcib Mikati Suriyanın yeni lideri Əhməd əş-Şara ilə telefon danışığı aparıb.

Axar.az xəbər verir ki, bu barədə Livan hökumətinin X hesabında paylaşım edilib.

Tərəflər telefon danışığı zamanı ötən gün Suriya-Livan sərhədində baş verən silahlı toqquşmanı müzakirə edib.

“Söhbət zamanı Əhməd əş-Şara Suriyanın müvafiq idarələrinin birgə sərhəddə sakitliyi bərpa etmək üçün lazım olan hər şeyi etdiyini təsdiqləyib və baş verənlərin təkrarlanmasının qarşısını almağa söz verib”, - məlumatda bildirilib.

Qeyd edək ki, yanvarın 3-də Baalbek bölgəsinin şərqində Livana daxil olmağa çalışan bir qrup silahlı suriyalı ilə toqquşma zamanı Livanın 4 əsgəri yaralanıb. Xəbərdarlıq atəşinə cavab olaraq silahlılar qumbaraatanlarla ordunun patruluna hücum ediblər. Onların Suriya ilə sərhəddə yerləşən Sirğayə məntəqəsindən gələn qaçaqmalçılarla əlaqədə olduqları müəyyən edilib. Atışmadan sonra sərhədin bu hissəsində yerləşən ordu hissələri əlavə təhlükəsizlik tədbirləri görüb. Öz növbəsində Dəməşqdən sərhədə mexanikləşdirilmiş hərbi birlik göndərilib və bundan sonra Livan ərazisində atəş dayandırılıb.