Bu, ən amansız zərbələrdən biri idi. Zərbə xüsusi olaraq maksimum ziyan vurmaq üçün hesablanıb. Raketlər şəhərin mərkəzi hissəsinə də düşüb. Doqquz yaşayış binası, ticarət mərkəzi və mağazalar hücuma məruz qalıb.

Axar.az xəbər verir ki, bunu Ukrayna Prezidenti Vladimir Zelenski Donetsk vilayətinin Dobropillya şəhərinin mərkəzi hissəsinə zərbələr endirməsini şərh edərkən bildirib.

“Rusiya sözün əsl mənasında hər gün öz qəddarlığı ilə sübut edir ki, orada - Moskvada onlar üçün heç nə dəyişməyib. Onlar müharibəni necə bitirmək haqqında deyil, dünya onlara bu müharibəni aparmağa icazə verdiyi halda, daha çox məhv edib, ələ keçirməyi necə bacaracaqlarını düşünürlər”, - Zelenski söyləyib.

Qeyd edək ki, Rusiya qoşunlarının cümə günü axşam saatlarında Ukraynanın Donetsk vilayətinin Dobropillya şəhərinin mərkəzi hissəsinə zərbələr endirməsi nəticəsində azı 11 nəfər həlak olub, 30 nəfər isə yaralanıb.