Moskva Trampın Ukraynada atəşkəs istəyini dəstəkləməkdə iqtisadi və geosiyasi fayda görür, lakin Kremlin hərbi məqsədləri dəyişməyib.

Axar.az xəbər verir ki, bu barədə “Nyu York Tayms”da dərc olunan təhlildə bildirilib.

Nəşr qeyd edib ki, Rusiya ABŞ Prezidenti Donald Trampın Ukraynada “ölüm yürüşünü” mümkün qədər tez dayandırmaq istəyini dəstəkləməkdə maraqlıdır. Lakin Vladimir Putin üçün Trampla atəşkəs danışıqları daha geniş hədəflərə çatmaq üçün bir vasitədir:

“Rusiya və ABŞ rəsmiləri 24 martda Səudiyyə Ərəbistanında görüşərək, Qara dənizdə enerji obyektlərinə və gəmilərə hücumların dayandırılması məqsədilə qismən atəşkəslə bağlı texniki detalları müzakirə edəcəklər. Ukrayna tammiqyaslı barışığa hazır olduğunu bildirsə də, Putin əvvəlcə geniş güzəştlər tələb edəcəyini açıq şəkildə ifadə edib.

Nəticədə Kremlin əsas məqsədi Trampın Ukrayna ilə sülh sazişi bağlamaq istəyindən maksimum siyasi və iqtisadi fayda əldə etməkdir. Moskva Vaşinqtonla münasibətlərin yaxşılaşmasını geosiyasi və iqtisadi üstünlük hesab edir – hətta Rusiya raketləri Ukraynanı atəşə tutmaqda davam etsə belə”.