Avropa Komissiyası təhlükəsiz ölkələrin yeni siyahısını açıqlayıb.

Axar.az xəbər verir ki, siyahıda yeddi ölkə - Banqladeş, Misir, Hindistan, Kolumbiya, Kosova, Mərakeş və Tunis təhlükəsiz mənşə ölkələri kateqoriyasına daxil edilib. Bu ölkələrdən gələn sığınacaq müraciətlərinə gələcəkdə sürətləndirilmiş prosedur qaydasında – maksimum üç ay ərzində baxılması planlaşdırılır. Lakin hər bir müraciət fərdi qaydada qiymətləndirilməlidir və bu, əsas hüquqi prinsiplərdən biridir.

Təklif olunan siyahı Avropa Birliyinə (AB) üzv ölkələrin hamısında keçərli olacaq, lakin milli siyahıları əvəz etməyəcək. Eyni zamanda, AB üzvlüyünə namizəd ölkələrin də təhlükəsiz ölkə statusu alması nəzərdə tutulur. İstisnalar isə zorakılıqla müşayiət olunan regionlara, sanksiyalara məruz qalan ölkələrə və yüksək qəbul faizi olan dövlətlərə şamil ediləcək.

Qeyd edək ki, son dövrlərdə qanunsuz miqrasiya ilə bağlı Avropada bir çox ölkədə daha sərt xarakter alan siyasi müzakirələr ictimaiyyət arasında narazılığın artmasına və sağ populist partiyaların nüfuz qazanmasına səbəb olub. İfrat sağçı partiyaların Avropa Birliyi əleyhinə sərt açıqlamaları AB-nin qanunsuz miqrasiya ilə bağlı siyasəti sərtləşdirməsinə öz təsirini göstərir.