Çinli tədqiqatçılar heç bir nüvə materialından istifadə etməyən hidrogen əsaslı partlayıcı qurğunu uğurla sınaqdan keçiriblər.

Axar.az xəbər verir ki, bu barədə Çinin "South China Morning Post" nəşri məlumat yayıb.

Nəşrin məlumatına görə, nəzarət olunan sahə sınaqları zamanı dağıdıcı kimyəvi zəncirvari reaksiya meydana çıxıb.

Bildirilib ki, qurğunu Çin Dövlət Gəmiqayırma Korporasiyasının (CSSC) 705 Araşdırma İnstitutu hazırlayıb. Bombada maqnezium hidrid adlı kimyəvi birləşmədən istifadə edilir. İki kiloqramlıq cihazın sınaq partlayışı zamanı temperaturu 1000 dərəcədən çox olan alov topu yaranıb.

"Adi partlayıcılarla aktivləşdirildikdə maqnezium hidrid sürətli termal parçalanmaya məruz qaldı, hidrogen qazını buraxdı və alovlandı”, - institutun elmi əməkdaşı Van Syuefen deyib.

Qurğunun yaradıcılarının fikrincə, bu kombinasiya partlayışın intensivliyinə dəqiq nəzarət etməyə, geniş ərazidə hədəflərin vahid şəkildə məhv edilməsinə asanlıqla nail olmağa imkan verir.