Böyük Britaniyada polis Kral III Çarlzın qvardiyasına qarşı planlaşdırılan terror aktının qarşısını alıb.

Axar.az xəbər verir ki, bu barədə “Sun” qazeti məlumat yayıb.

Məlumata görə, hüquq-mühafizə orqanlarının əməkdaşları Britaniya monarxını qoruyan hərbçiləri hədəfə alan hücum planını vaxtında aşkar ediblər.

Ötən həftə Slau şəhərində hücum və yandırma məqsədilə silah saxlamaqda şübhəli bilinən bir gənc saxlanılıb. Daha sonra o, terror aktı hazırlamaqda ittiham olunub. İstintaq ilkin olaraq onun təkbaşına hərəkət etdiyini göstərir.

Hadisədən sonra təhlükəsizlik tədbirləri gücləndirilib. Kral III Çarlzın təhlükəsizliyini təmin edən Koldstrim mühafizəçilərinə iki gün ərzində hərbi geyimdə kazarma xaricinə çıxmaq qadağan olunub.

Qeyd edək ki, kazarma kralın rəsmi iqamətgahı olan Vindzor sarayına çox yaxın məsafədə yerləşir.