İran Prezidenti Məsud Pezeşkianın yerlərdəki yaxın adamları İsrail və Qərb ölkələrinə qarşı türk dilində geniş təbliğat kampaniyasına başlayıblar.

Axar.az xəbər verir ki, bununla bağlı sosial media platformalarında çox sayda videolar yayılır.

Həmin videolarda Azərbaycan türkcəsində şeirlər oxunur, İran "şir"ə oxşadılır, Azərbaycan isə “şir”in başı adlandırılır.

İran əhalisi və azərbaycanlıların hisslərinə toxunmaq və onları coşdurmaq üçün video-kliplərin əksəriyyətində məcburi hicab qaydalarını pozan gənc və yaraşıqlı qızlardan istifadə olunur.

Bununla eyni vaxtda Təbriz, Urmiya, Ərdəbil və başqa bir neçə Azərbaycan şəhərində bir sıra “ziyalı”, musiqiçi və “milli fəal”ların imzası ilə İsrailin hücumlarını pisləyən və İranın müdafiəsinə çağıran bəyanatlar yayılıb. Həmin bəyanatlarda İran-İraq müharibəsi dövründə olduğu kimi, yenə də azərbaycanlılar “qeyrətli”, “mübariz” və “fədakar” xalq adlandırılır, onların İranın qorunmasındakı tarixi xidmətləri xatırladılır.

Qeyd edək ki, İran-İraq müharibəsində xüsusən Şərqi və Qərbi Azərbaycan əyalətlərinin hərbçiləri və könüllüləri birbaşa ön cəbhəyə göndərilir, onlardan minalı sahələrin təmizlənməsi və İraq ordusunun ön xətdəki müdafiə səngərlərini dağıtmaq üçün istifadə olunurdu. Buna görə də “xətt şekən” (müdafiə xəttini yaran) adandırılan azərbaycanlılardan ibarət hərbi bölmələr daha çox itki verirdi.