Sərt karantin tədbirlərindən sonra ölkədə gündəlik yoluxmada kəskin azalma müşahidə edilsə də, ölüm hallarının sayında hər hansı dəyişiklik baş verməyib. Bu isə cəmiyyətdə birmənalı qarşılanmayıb.

Məsələ ilə bağlı Axar.az-a danışan infeksionist Vüqar Cavadzadə bildirib ki, ölüm hallarının azalmamasına səbəb xəstəxanalarda müalicə alanların əksəriyyətinin vəziyyətinin ağır olması ilə bağlıdır:

“Koronavirusa yoluxanların bir çoxu evdə müalicə olunur. Evdə isə düzgün müalicə olunmayan, özbaşına dərman qəbul edən və ya naşı şəxslər tərəfindən müalicə yazılan xəstələrin vəziyyətində ağırlaşma qeydə alınır. Məhz bu halda xəstəxanaya müraciət edildiyi üçün hazırda xəstəxanada müalicə alanların əksəriyyətinin vəziyyəti orta-ağır və ya ağırdır. Ölüm hallarının azalmamasına səbəb də budur”.

İnfeksionist onu da qeyd edib ki, sərt karantində yoluxma azalsa da, qeyri-rəsmi rəqəmlərlə birlikdə say gündəlik statistikadan 2-3 dəfə çox olur:

“Sərt karantin rejiminin tətbiq edilməsi ilə yoluxma sayında azalma müşahidə edilir. Bu azalmanı biz həkimlər də gündəlik iş rejimimizdə hiss edirik. Amma nəzərə almaq lazımdır ki, testdən kənarda qalan xəstələr də var. Qeyri-rəsmi rəqəmlərlə birlikdə yoluxanların sayı gündəlik açıqlanan statistikadan 2-3 dəfə artıqdır”.

Qeyd edək ki, sərt karantindən sonra rəsmi açıqlanan rəqəmlərdə gündəlik yoluxma sayı 4600-dən 3 dəfəyə yaxın aşağı düşsə də, ölüm halları 38-dən az olmur.