Türkdilli Dövlətlərin Əməkdaşlıq Şurası (TDƏŞ) gələcəkdə Avropa Birliyinin (AB) bənzəri olan bir təşkilata çevrilə bilər.

Bu sözləri Axar.az-a açıqlamasında politoloq Fikrət Sadıqov Bakıda Türkdilli Dövlətlərin Əməkdaşlıq Şurasına (Türk Şurası) üzv dövlətlərin xarici işlər nazirlərinin növbədənkənar iclası haqda danışarkən deyib. Onun sözlərinə görə, Türkdilli Dövlətlərin Əməkdaşlıq Şurasının fəaliyyətinin əsas məqsədi türkdilli ölkələr arasında hərtərəfli əməkdaşlığa yardım etməkdir:

“Azərbaycan Türkdilli Dövlətlərin Əməkdaşlıq Şurasını olduqca mühüm hesab edir. Bu baxımdan belə bir mötəbər tədbirin məhz ölkəmizdə keçirilməsi olduqca vacib hadisədir. Ölkəmiz müstəqilliyin ilk illərindən etibarən hər zaman türkdilli ölkələrlə əməkdaşlıqda maraqlı olub. Bu gün Azərbaycan bütün türk ölkələri ilə çoxsahəli əlaqələrə malikdir. Xüsusilə də milli maraqların üst-üstə düşməsi və tarixi etnik bağları bu əlaqələrin inkişafında əsas amil hesab etmək olar. Bu istiqamətdə türkdilli dövlətlərin siyasi bir təşkilat fonunda görüşməsi münasibətlərin inkişafı baxımından olduqca önəmlidir. Şuranın görüşləri zamanı mədəni, iqtisadi, siyasi məsələlər müzakirə olunur. Bu isə artıq siyasi müstəvidə formalaşan geniş bir platforma deməkdir”.

Politoloq bildirib ki, Türkiyənin Türkdilli Dövlətlərin Əməkdaşlıq Şurasından gözləntiləri böyükdür:

“Şura hər zaman Türkiyənin maraq dairəsində olub. Türkiyə uzun illərdir ki, mədəni əlaqələr əsasında qurulan bu birliyin siyasi və iqtisadi cəhətdən daha da təkmilləşməsinə çalışır. Türkiyə Xarici İşlər naziri Mövlud Çavuşoğlu artıq Bakıda bir çox önəmli görüşlər keçirib. Xüsusilə də Prezident İlham Əliyevlə görüşü zamanı olduqca maraqlı məqamlara toxunulub. Azərbaycan və Türkiyənin Türkdilli Dövlətlərin Əməkdaşlıq Şurasının plenar iclaslarında ortaq mövqedən çıxış etməsi əslində digər üzv ölkələr üçün də örnək olmalıdır”.