Almaniya və Fransanın xarici işlər nazirləri Annalena Berbok və Jan-Noel Barronun Suriyaya birgə səfəri “burada biz də varıq” mənası daşıyır.

Axar.az xəbər verir ki, bu sözləri politoloq Elxan Şahinoğlu Berbok və Barronun Suriyaya birgə səfərini şərh edərkən deyib.

O bildirib ki, HTŞ lideri Əhməd əl-Şara hər iki nazirlə görüşüb:

“Suriya keçid hökumətinin siyasi dəstəklə yanaşı, müxtəlif dövlətlərin maliyyə dəstəyinə də ehtiyacı var, paytaxt Dəməşqin xaricində şəhərlərin az qala tən yarısı dağıntılar altındadır, su, qaz, elektrik, yanacaq yoxdur. Beynəlxalq təşkilatların ümumi rəyinə görə, Suriya infrastrukturunu bərpa etmək üçün ilkin mərhələdə 400 milyard dollara ehtiyacı var. Əlbəttə, Türkiyə Suriyada əsas oyunçuya çevrilib, ancaq Ankaranın qonşu ölkənin infrastrukturunu bərpa etmək üçün o qədər maliyyəsi yoxdur. Ona görə də Suriya keçici hökuməti maliyyə ayıra biləcək istənilən ölkə ilə əməkdaşlığa hazırdır. Təsadüfi deyil ki, Suriya keçici hökumətinin xarici işlər naziri ilk səfərini Səudiyyə Ərəbistanına edib”.