PKK-da 30 nəfərlik ilk qrupun silahı buraxması ilə qruplaşmanın ləğvi qərarı praktiki mərhələyə keçdi. Bu mərhələnin davamında müəyyən problemlər yaşana, kiçik qruplar prosesi pozmağa çalışa bilər, lakin PKK-nın əvvəlki dövrə qayıtmasının çətin olacağı məlumdur.

Axar.az xəbər verir ki, bu sözləri politoloq Asif Nərimanlı PKK-nın ilk dəstəsinin bu gün silahı yerə qoymasını şərh edərkən deyib.

“Silahların məhz yandırılması da simvolik xarakter daşıyır: bu, yenidən silahlanmayacaqları deməkdir.

Azərbaycanın Qarabağı azad etməsi və erməni separatizmini sıradan çıxarmasından sonra Türkiyənin də PKK problemini həll etməsi/etməyə başlaması iki müttəfiqin regionda hakim mövqeyini gücləndirən amildir. Çünki indiyə qədər maraqlı tərəflər Qarabağın işğalını-erməni separatizmini Bakıya, PKK-nı Ankaraya qarşı “buxov” kimi istifadə etməyə çalışırdı. Bu “buxov”ların qırılması Əliyevin dediyi “XXI əsr türk əsri olacaq” sözlərinin reallıq perspektivini gücləndirir”, - o bildirib.