Fevralın 27-də Sumqayıt şəhərində vətəndaşlarla birbaşa ünsiyyətin təmin edilməsi, mövcud problemlərin operativ şəkildə araşdırılması və həlli məqsədilə növbəti səyyar qəbul-görüş təşkil olunub. Qəbul Sumqayıt şəhər İcra Hakimiyyətinin başçısı Zakir Fərəcov tərəfindən şəhərin 8-ci mikrorayon ərazisində keçirilib.

Axar.az xəbər verir ki, səyyar qəbulda Sumqayıt şəhər İcra Hakimiyyətinin məsul şəxsləri, aidiyyəti idarə və müəssisələrin nümayəndələri və sakinlər iştirak ediblər. Görüş zamanı vətəndaşların gündəlik həyatlarını narahat edən məsələlər, sosial-məişət problemləri, abadlıq, infrastruktur, kommunal xidmətlər və digər sahələrlə bağlı müraciətləri diqqətlə dinlənilib.

Qəbul prosesində qaldırılan müraciətlərin bir hissəsi yerindəcə həll olunub, icrası mümkün olmayan məsələlərlə bağlı isə müvafiq araşdırmaların aparılması və qanunvericiliyin tələblərinə uyğun şəkildə operativ tədbirlərin görülməsi üçün aidiyyəti qurum rəhbərlərinə konkret tapşırıqlar verilib.

Görüş zamanı şəhər rəhbəri Sumqayıtda aparılan genişmiqyaslı abadlıq-quruculuq, yenidənqurma və sosial infrastruktur layihələri barədə sakinlərə məlumat verib, bu istiqamətdə görülən işlərin mərhələli şəkildə davam etdiriləcəyini qeyd edib. Vətəndaşlar öz növbəsində şəhərdə həyata keçirilən müsbət dəyişiklikləri yüksək qiymətləndirərək, səyyar qəbulların problemlərin yerində və vaxtında həllinə mühüm töhfə verdiyini bildiriblər.

Qeyd edək ki, vətəndaş məmnunluğunun artırılması, açıq dialoqun təmin edilməsi və yerli problemlərin birbaşa ünsiyyət yolu ilə həlli məqsədilə Sumqayıt şəhərində səyyar qəbul-görüşlər davamlı olaraq keçirilir.