“AzerGold” Qapalı Səhmdar Cəmiyyətinin (QSC) İdarə Heyətinin sədri Zakir İbrahimov 4-cü “Yüksəliş” müsabiqəsinin Mentorluq proqramı çərçivəsində müsabiqə qalibləri Aslan Həsənli və Rüfət Məmmədxanlı ilə proqramın nəticələrinə həsr olunmuş yekun görüş keçirib.

Axar.az xəbər verir ki, bir ili əhatə edən Mentorluq proqramının yekunlarına dair keçirilən görüşdə Zakir İbrahimov qaliblərin ötən müddət ərzində nümayiş etdirdikləri aktivliyi və fərdi inkişaf planı üzrə əldə etdikləri nailiyyətləri yüksək qiymətləndirib. Sədr vurğulayıb ki, Azərbaycan Respublikasının Prezidenti cənab İlham Əliyevin Sərəncamı ilə təsis edilən “Yüksəliş” müsabiqəsi ölkəmizdə müasir idarəçilik prinsiplərinə yiyələnmiş yeni nəsil rəhbər kadrların yetişməsində müstəsna rol oynayır.

Görüş zamanı proqram müddətində müzakirə olunan dövlət idarəetmə metodları, strateji qərarların qəbulu, korporativ idarəçilik və səmərəli kommunikasiya mövzularının qaliblərin gələcək fəaliyyətlərində tətbiqi məsələləri ətrafında fikir mübadiləsi aparılıb. Zakir İbrahimov mentorluq müddətinin başa çatması münasibətilə qalibləri təbrik edərək, onlara peşəkar fəaliyyətlərində və dövlətçiliyimizin inkişafı naminə gələcək addımlarında uğurlar arzulayıb.

“Yüksəliş” müsabiqəsinin qalibləri Aslan Həsənli və Rüfət Məmmədxanlı bir il ərzində göstərilən diqqətə, şəxsi və peşəkar inkişafları üçün yaradılan şəraitə, həmçinin zəngin idarəçilik təcrübəsini onlarla bölüşdüyünə görə mentor Zakir İbrahimova dərin minnətdarlıqlarını bildiriblər. Qaliblər bu müddət ərzində əldə etdikləri bilik və bacarıqların onların liderlik keyfiyyətlərinin formalaşmasında həlledici rol oynadığını qeyd ediblər.

Görüşün yekununda Zakir İbrahimov Mentorluq proqramını uğurla başa vuran hər iki müsabiqə qalibinə Xasiyyatnamə təqdim edib.