Küçələrdə az qala addımbaşı rast gəldiyimiz reklam kağızlarının yerləşdirilməsi qanun pozuntusudur.

Bunu hüquqşünas Səməd Vəkilov Axar.az-a küçə reklamları haqda danışarkən deyib. Onun sözlərinə görə, reklam və müxtəlif məzmunlu elan kağızlarına daha çox küçələrdə, nəqliyyat vasitələrində, dayanacaqlarda, bina divarlarında, lift və sayğac qutularının üzərində rast gəlinir:

“Bu cür reklam kağızaları müvafiq icra hakimiyyəti orqanının icazəsi ilə yerləşdirilməlidir. İcazə olmadan yaşayış məntəqələrində küçə reklam daşıyıcılarının yerləşdirilməsinə görə reklam daşıyıcıları müsadirə edilməklə və ya edilməməklə, fiziki şəxslər 50 manatdan 100 manatadək, vəzifəli şəxslər 150 manatdan 250 manatadək, hüquqi şəxslər 1500 manatdan 2000 manatadək məbləğdə cərimə edilir.

Müvafiq icra hakimiyyəti orqanının razılığı olmadan nəqliyyat vasitələrində reklamın yerləşdirilməsinə görə isə fiziki şəxslər 30 manatdan 50 manatadək, vəzifəli şəxslər 150 manatdan 200 manatadək, hüquqi şəxslər 1500 manatdan 2000 manatadək məbləğdə cərimə edilir.

Elan kağızlarının qanunsuz yerləşdirilməsinə Mənzil İstismar Sahələri nəzarət etməlidirlər”.