Üç aydır maaş ala bilməmələri Muğan Aqrosənaye Şirkətinin işçilərinin səbrini daşırıb.

Axar.az İran mediasına istinadla xəbər verir ki, mayın 7-də Muğan Aqrosənaye Şirkətinin 300-dən çox işçisi şirkətin önündə etiraz aksiyası keçirərək gecikmiş əmək haqqı, habelə əlavə iş saatı maaşlarını tələb ediblər.

“İşçilərin əksəriyyəti kirayə evlərdə yaşayır, onların dərsə gedən uşaqları var. Ağır iqtisadi vəziyyətdən dolayı Muğan Aqrosənaye Şirkəti işçilərin maaşını 3 aydır ödəyə bilmir. Biz bu vəziyyətə dəfələrlə etiraz etmişik, lakin heç bir nəticə yoxdur”, - deyə etirazçılar bildirib.

Şirkətin mərkəzi ofisinin qarşısında keçirilən aksiya şəhər rəhbərliyinin diqqətini çəkib. Məlumata görə, Parsabad şəhər fərmandarı (icra başçısı), şəhər prokuroru və polis rəisi etirazçıların toplaşdığı yerə gəlib, onlarla söhbət ediblər.

Bu, son bir il ərzində sözügedən şirkətin işçilərinin 3-cü etiraz aksiyasıdır.